ಮೌನ

ಮೌನ ... ಮುಗಿಯದ ಮೌನ
ಎಷ್ಟು ದೂರ ನಡೆದರೂ, ಓಡಿ ದಣಿದರೂ
ಖಾಲಿಯಾಗದ ಮೌನ,

ಗಾವುದ ಗಾವುದ ದೂರದಲ್ಲಿ ಎಲ್ಲೋ
ಸಮುದ್ರದ ಮೊರೆತ,
ಧ್ವನಿ ಕ್ಷೀಣ ... ಕ್ಷೀಣ,
ಕಾಲದ ಗರ್ಭ ಸೀಳಿ ಬಂದ ವರ್ಷಗಳ ಹಿಂದಿನ ಸದ್ದು ,
ಮಳೆ ಬಂದು , ಹನಿಯಾಗಿ
ದಾರಿ ಉದ್ದಕ್ಕೂ ಉಜ್ಜಿ ಹರಿದು
ಸಾಗರ ಸೇರಿದ ಸದ್ದು ,
ಗಾವುದ ಗಾವುದ ದೂರದ ಸದ್ದು .

ಕಾಲದ ಸರಹದ್ದು ನನ್ನ ಕಿವಿಗಳು ...
ಅಷ್ಟೇ ಏಕೆ ನೆನಪಿನ ಕೈಗೆಟುಕದ್ದು ,
ಅದರ ಹಿಂದೆ ಓದಿದಷ್ಟು ದೂರ ಕತ್ತಲು ,
ಅದು ನನ್ನ ದೂಡಿ ಮುಂದೋಡುವ ನನ್ನದೇ ನೆರಳು.

ನನ್ನ ಮುಂದಿರುವುದು ಬಿಗಿಯಾದ ಮೌನ,
ವಿಸ್ತಾರವಾದ ಮೌನ ,
ಅಳು, ನಗು, ಭಯ, ಬೆದರು
ಎಲ್ಲವನ್ನೂ ಒಂದೇ ಏಟಿಗೆ ನುಂಗಿ ಹಾಕಿದ ಮೌನ,
ಬೆನ್ನಿಗೆ ಹಾಕಿದ ನೆನಪಿನ ಬ್ಯಾಗಿನಲ್ಲಿ
ಅಲ್ಲಲ್ಲಿ ಡಬ್ಬಿಗಳ, ಬಾಟ್ಲಿಗಳ ಸದ್ದು

ಮೊರೆತ ಮತ್ತೆ ಕ್ಷೀಣ ಕ್ಷೀಣ
ಮತ್ತಷ್ಟು ಮೌನ , ಮತ್ತಷ್ಟು ಮೌನ 

ಹಿಂದೆಂದೋ ಕನಸಲ್ಲಿ ಕಂಡ ನೆನಪು

ಹಿಂದೆಂದೋ ಕನಸಲ್ಲಿ ಕಂಡ ನೆನಪು

ನೀ ಮುಷ್ಟಿಯಲ್ಲಷ್ಟು ಜೀವರಸ ಹಿಡಿದು
ಕಾಲದ ಗರ್ಭಸೀಳಿ ನಡೆದೆ,
ಬಟ್ಟಲಲ್ಲಿ ತಂದಿದ್ದು ಕೇವಲ ನೀರಲ್ಲ,ನೆನಪು
ಅಕ್ಕ-ಪಕ್ಕದ್ದನ್ನೂ ಸೇರಿಸಿ ರಂಗು-ರಂಗಾದೆ , ಮುಂದೆ ನಡೆದೆ

ಹಿಂದೆಂದೋ ಕನಸಲ್ಲಿ ಕಂಡ ನೆನಪು ...

ಏರಿ ಇಳಿದು ,ತಗ್ಗಲ್ಲಿ ಬಗ್ಗಿ,
ನುಸುಳಿ ಸಿಂಧೂ ತಟಕ್ಕೆ ನೀ ಅಂದು ಬಂದಿದ್ದೆ
ಅಂದು ನಿನ್ನ ನೋಡಿ
ಹುಡಿ ಹಾರಿಸಿದ್ದರು ಮಂದಿ,
ಇಂದೂ ಕೂಡ
ಮುಖ ಮೊರೆ ಉಜ್ಜಿ ತೊಳೆದು
ನಡು ಬಗ್ಗಿಸಿ , ಈಗಲೂ  ನೋಡುವವರೇ
ಆ ನಿನ್ನ ಕುರುಹು ,

ಅಮ್ಮ ಹೇಳಿದ್ದು ನೆನಪಿದೆ ,
ನೀನು ಇತ್ತೀಚಿಗೆ ಕಾಣುವುದೇ ಇಲ್ಲವಂತೆ?
ಬಟ್ಟಲು ಬತ್ತಿ ಹೋಗಿದೆಯಂತೆ ?
ಅರೆ ... ನೀನಿಲ್ಲದೇ ಹೋದರೆ ಏನಾದೀತು ?
ಮುಖ ತೊಳೆಯುವುದಿಲ್ಲವಷ್ಟೆ .... ಸ್ನಾನ - ಸಂಧ್ಯಾವಂದನೆಗಳಿಲ್ಲ
ಹಸುರಿಲ್ಲ ... !!!
ನವಿರಿಲ್ಲ ... !!!
ಇವೆಲ್ಲದರೊಟ್ಟಿಗೆ ನೆನಪೂ ಇಲ್ಲ
ನೆನಪೂ ಇಲ್ಲ

ನಾಳೆ ಮತ್ತೆ ಬಣ್ಣ ಹಚ್ಚಬೇಕು, ಕುಣಿಯಬೇಕು

ಹೊಸ ಬ್ರಶ್ಶನ್ನು ತೆರೆದು ಗೀಚುವೆ,
ನೇರ ಮುಖದ ಮೇಲೆ ಬರೆವೆ,
ಕೆಂಪು, ಹಸಿರು, ಹಳದಿ  ಬಣ್ಣಗಳ ಮುಖವಾಡ,
ಒಂದು ಕಣ್ಣಿನಿಂದ ನೇರ ಇನ್ನೊಂದಕ್ಕೆ ಗೀರು,
ನಾಸಿಕದ ಬಳಿ , ಕಿವಿಗಳ ಮಧ್ಯೆ , ಮೀಸೆ ದಾಡಿಗಳೆಲ್ಲದರ ಮೇಲೆ
ಸುಕ್ಕುಗಟ್ಟಿದ ಮುಖ ಇದರ ಹಿಂದೆ ಅಡಗಿ ಹೋಗುವಂತೆ ...

ಹೊಸ ಬ್ರಶ್ಶನ್ನು ತೆರೆದು ಗೀಚುವೆ...

ನಂಗೀಗ ಅರವತ್ತು ವರ್ಷ,
ಎಪ್ಪತ್ತೇ ? ಎಂಭತ್ತೇ ? .. ಗೊತ್ತಿಲ್ಲ !
ಬಣ್ಣ ಹಚ್ಚಿದ್ದು, ಕುಣಿದದ್ದಷ್ಟೇ ಲೆಖ್ಖ ,
ಎದುರಿದ್ದವನ ಮೋರೆಯ ಆಧರಿಸಿ ಬಣ್ಣ
ಹಚ್ಚಿಕೊಳ್ಳುವುದು ಸಾಮಾನ್ಯವಲ್ಲ ,
ಅವನ ಮುಖದ ಸುಕ್ಕು ಸುಕ್ಕುಗಳಿಗೊಂದೊಂದು ಬಣ್ಣ
ಬಳಿದುಕೊಂಡು  ನಾನು ರಂಗು-ರಂಗು

ಅಳು, ನಗು, ಸಿಟ್ಟು, ಸೆಡವು
ಎಲ್ಲವನ್ನೂ ಅಭಿನಯಿಸುತ್ತೇನೆ
ಸೆಟ್ಟಿನ ಲೈಟೆಲ್ಲವೂ ಆರುವವರೆಗೆ ,
ಆಮೇಲೆ ಬಾನಿನ ಲಾಟೀನಿನಡಿ ಬೀಡಿ ಹಚ್ಚಿ ಮಲಗುವೆ
ಅದರ ಹೊಗೆಯ ಬೆಚ್ಚಗಿನ ಮಬ್ಬಿನಲಿ ಕಣ್ಣು ಮುಚ್ಚಿ ,
ತಲೆಯ ತಪ್ಪಲೆಯಲ್ಲಿ ಅದೇ ಯೋಚೆನೆಯ ಗಿರಗಿಟ್ಟಲೆ ಸುತ್ತಿ ,

ನಾಳೆ ಮತ್ತೆ ಬಣ್ಣ ಹಚ್ಚಬೇಕು, ಕುಣಿಯಬೇಕು